मुंबई : संगीत क्षेत्रातील दिग्गज व्यक्मित्त्वांवर, तसेच तृतीयपंथी गौरी सावंत यांच्यावर लेखन करणारे युवा लेखक रिदम वाघोलीकर यांना यंदाच्या ‘महाराष्ट्र अचिव्हर्स अॅवॉर्डस्’च्या ‘वर्ड स्मिथ ऑफ द इयर’ पुरस्काराने गौरविण्यात आले. अभिनेता राजकुमार राव आणि संजना गलरानी यांच्या हस्ते वाघोलीकार यांना हा पुरस्कार देण्यात आला.
‘ईटी एज’ आणि ‘फेमिना’ यांच्या वतीने हे पुरस्कार देण्यात येतात. सिनेमा, क्रिडा, उद्योग-व्यवसाय, वैद्यकीय आणि कला क्षेत्रात महाराष्ट्राचा अभिमान वाढविण्याचे उत्कृष्ट कार्य करणाऱ्यांना ‘महाराष्ट्र अचिव्हर्स अॅ्वॉर्ड’ देऊन सन्मानित केले जाते.
रिदम वाघोलीकर आणि रचना खडीकर शहा यांनी गानसम्राज्ञी लता मंगेशकर, गानसरस्वती किशोरी आमोणकर यांच्यावर पुस्तके लिहिली आहेत. लता मंगेशकर यांच्यावरील पुस्तक ग्रामोफोनच्या, तर किशोरीताईंवरील पुस्तक स्वरमंडळाच्या (इंडियन हार्प) आकारात आहे.
आता रिदम वाघोलीकर यांनी तृतीयपंथी कार्यकर्त्या गौरी सावंत यांचा जीवन प्रवास उलगडणारे, ‘गौरी- द अर्ज टू फ्लाय’ हे पुस्तक लिहिले आहे. या पुस्तकाच्या माध्यमातून त्यांनी लहान वयात प्राप्त केलेल्या लोकप्रियतेमुळे त्यांना हा पुरस्कार मिळाला आहे.
या कार्यक्रमात रिदम वाघोलीकर यांच्या समवेत अभिनेत्री अलिया भट, राणी मुखर्जी, दिग्दर्शक एकता कपूर, बप्पी लाहिरी, अभिनेता विकी कौशल, क्रिकेटपटू सुनील गावस्कर आणि केदार जाधव यांनादेखील गौरविण्यात आले.